کشمیر میں نیا ریلوے پل: ایفل ٹاور سے 35 میٹر بلند
دنیا کا سب سے اونچا ایک محراب والا ریلوے پل، جو ایفل ٹاور سے بھی 35 میٹر اونچا ہے، پہلی بار بھارت کے زیر انتظام کشمیر کو ملک کے دیگر حصوں سے ٹرین کے ذریعے جوڑنے کے لیے تیار ہے۔ یہ پل جموں کے ضلع ریاسی میں دریائے چناب پر تعمیر کیا گیا ہے اور اسے مکمل کرنے میں بھارتی ریلوے کو 20 سال سے زیادہ کا وقت لگا۔
یہ پل بکل اور کوری کے علاقوں کے درمیان پہلی ٹرین کی آمد کا منتظر ہے اور 272 کلومیٹر طویل ریلوے لائن کا حصہ ہے جو ہر موسم میں چلائی جائے گی۔ یہ لائن جموں سے گزرتی ہوئی وادی کشمیر تک جائے گی، حالانکہ وہاں تک اس کی تکمیل کے لیے ابھی تک کوئی مقررہ وقت نہیں۔
سردیوں میں شدید برفباری کی وجہ سے وادی کشمیر کا سڑک رابطہ اکثر منقطع ہو جاتا ہے، کیونکہ برف سے جموں سے آنے والی شاہراہ پر رکاوٹیں پیدا ہو جاتی ہیں۔
ماہرین کا کہنا ہے کہ اس نئی ریلوے لائن سے بھارت کو شورش زدہ سرحدی علاقے میں سٹریٹجک برتری حاصل ہو گی۔ کشمیر کا ہمالیائی علاقہ کئی دہائیوں سے بھارت اور پاکستان کے درمیان ایک اہم تنازعہ کا حصہ رہا ہے، اور دونوں ہمسایہ ممالک نے 1947 میں آزادی کے بعد اس علاقے پر دو جنگیں بھی لڑیں۔
کشمیر پر دونوں ممالک مکمل طور پر دعویٰ کرتے ہیں، لیکن ان کے پاس اس کے صرف کچھ حصوں کا کنٹرول ہے۔ بھارت کے زیر انتظام علاقے میں 1989 سے مسلح بغاوت نے ہزاروں افراد کی جان لی ہے اور وہاں فوج کی بھاری نفری اب بھی موجود ہے۔
