پی ٹی آئی کا 29 ستمبر کو میانوالی میں جلسہ کرنے کا اعلان
پشاور (ڈیلی پاکستان آن لائن) — پاکستان تحریک انصاف (پی ٹی آئی) نے 29 ستمبر کو میانوالی میں ایک بڑا جلسہ کرنے کا اعلان کیا ہے۔ پارٹی کے چیئرمین بیرسٹر گوہر علی خان نے میڈیا سے گفتگو کرتے ہوئے کہا کہ یہ جلسہ اتوار کے روز ہوگا، حالانکہ حکومت کی جانب سے انہیں جلسے کے لیے این او سی نہیں ملتا۔ اگر ملتا بھی ہے تو اس میں ایسی شرائط رکھی جاتی ہیں کہ جلسہ نہیں ہو سکتا۔
گوہر علی خان نے لاہور میں حالیہ کامیاب جلسے کا ذکر کرتے ہوئے کہا کہ عوام نے صرف 7 گھنٹوں میں تاریخی جلسہ کر کے دکھایا، جبکہ جلسے کے دن پورا موٹروے بند تھا۔ انہوں نے کہا کہ وہ خود 4 گھنٹے لاہور کی سڑکوں پر پھرتے رہے۔
انہوں نے مزید کہا کہ لاہور جلسے میں پولیس کی موجودگی کی وجہ سے تصادم کا خدشہ تھا، لیکن ہم نے اپنے کارکنان کو پرامن رہنے کی ہدایت کی۔
پی ٹی آئی کے چیئرمین نے اس بات پر زور دیا کہ کسی بھی ملک میں آزاد عدلیہ کا ہونا ضروری ہے، اور حکومت کی جانب سے غیر آئینی ترامیم کی کوششوں پر تنقید کی۔ انہوں نے کہا کہ اگر کوئی جج حکومت کی مرضی کے فیصلے نہیں دیتا تو اسے تبدیل کیا جائے گا، جو کہ 25 کروڑ عوام کے پاکستان کے لیے خطرہ ہے۔
گوہر علی خان نے کہا کہ ملک میں مزید تجربات نہیں ہونے چاہئیں، اور انہوں نے سختیوں کو کم کرنے کی ضرورت پر زور دیا تاکہ معاملات آگے بڑھ سکیں۔
