وزیراعظم: آئی ایم ایف پروگرام کی شرائط پوری کرنے کیلئے اقدامات کر رہے ہیں
وزیراعظم شہباز شریف نے کہا ہے کہ پاکستان عالمی مالیاتی فنڈ (آئی ایم ایف) پروگرام کی شرائط پوری کرنے کے لیے اقدامات کر رہا ہے اور امید ہے کہ تمام شرائط وقت پر مکمل ہو جائیں گی۔
اسلام آباد میں وفاقی کابینہ کے اجلاس کے دوران، وزیراعظم شہباز شریف نے اظہار خیال کرتے ہوئے کہا کہ مہنگائی کا بوجھ بتدریج کم ہو رہا ہے، اور اگست میں مہنگائی کی شرح سنگل ڈیجٹ پر آ گئی ہے، جبکہ گزشتہ سال اسی وقت یہ شرح 27 فیصد تھی۔
انہوں نے کہا کہ سفر طویل ہے اور ہمیں تیزی سے آگے بڑھنا ہوگا، بدعنوانی کو ختم کرنا ہوگا، اور اسمگلنگ کا خاتمہ کرنا ہوگا۔ یہ ایک کٹھن راستہ ہے، لیکن ناممکن نہیں ہے، ہم منزل تک پہنچیں گے۔
وزیراعظم نے مزید کہا کہ ملک میں وسائل کی کمی نہیں ہے، معدنیات اور قدرتی وسائل موجود ہیں، اور اخراجات کم کرنے کی کوششوں کو تیز کرنا ضروری ہے۔
