مریم نواز: پنجاب حکومت تشدد پھیلانے والوں کے خلاف ہمہ وقت تیار
لاہور (ڈیلی پاکستان آن لائن) وزیر اعلیٰ پنجاب مریم نواز شریف نے کہا ہے کہ پنجاب حکومت تشدد پھیلانے والوں کے خلاف ہر وقت تیار ہے۔ عالمی یومِ عدم تشدد کے موقع پر اپنے پیغام میں انہوں نے کہا کہ ہر قسم کا تشدد اور انتشار پسندی قابل مذمت ہے، اور عدم تشدد کا راستہ ہی حقیقی کامیابی کا ضامن ہے۔
مریم نواز نے مزید کہا کہ معاشرتی ترقی اور فلاح کی بنیاد طاقت یا تشدد نہیں، بلکہ امن اور برداشت پر ہے۔ انہوں نے اس بات پر زور دیا کہ عدم تشدد کا نظریہ انسانیت کا سب سے بڑا نظریہ ہے، اور تشدد کسی مسئلے کا حل نہیں بلکہ مزید بگاڑ پیدا کرتا ہے۔
وزیر اعلیٰ کا کہنا تھا کہ عدم تشدد کا راستہ اپنانے والا معاشرہ ہی ترقی اور استحکام کی راہ پر گامزن ہوتا ہے۔ باہمی اختلافات کو بات چیت کے ذریعے حل کرنے کے کلچر کو فروغ دینا ضروری ہے۔
مریم نواز نے یہ بھی کہا کہ وہ ایک ایسے پنجاب کی تعمیر میں مصروف ہیں جہاں ہر شخص کو امن سے جینے کا حق حاصل ہو اور قانون کی حکمرانی ہو۔ انہوں نے تشدد، انتہاپسندی، اور نفرت کے خلاف عدم تشدد کے پیغام کو فروغ دینے کی ضرورت پر زور دیا، اور پرامن پاکستان کے لئے اپنی تمام تر توانائیاں صرف کرنے کی تاکید کی۔
