حکومت پاکستان نے عید میلاد النبی ﷺ کے موقع پر 17 ستمبر کو عام تعطیل کا اعلان کر دیا
پاکستانی حکومت نے نبی آخر الزمان حضرت محمد مصطفیٰ ﷺ کے یومِ ولادت، 12 ربیع الاول، کے موقع پر 17 ستمبر 2024 بروز منگل کو ملک بھر میں عام تعطیل کا اعلان کیا ہے۔
کابینہ ڈویژن کی جانب سے جاری نوٹیفکیشن کے مطابق، “17 ستمبر 2024 کو عید میلاد النبی (12 ربیع الاول 1446 ہجری) کے موقع پر ملک بھر میں عام تعطیل ہوگی۔”
دو دن قبل، ربیع الاول کے چاند کی رویت کے حوالے سے چیئرمین مرکزی رویت ہلال کمیٹی مولانا عبدالخبیر آزاد کی زیر صدارت اسلام آباد میں اجلاس منعقد ہوا تھا۔ اس اجلاس میں رویت ہلال زونل کمیٹی اسلام آباد، سپارکو، محکمہ موسمیات اور وزارت سائنس و ٹیکنالوجی کے نمائندوں نے شرکت کی تھی۔
زونل رویت ہلال کمیٹیوں کے اجلاس بھی جاری رہے، جن میں ماہ ربیع الاول کے چاند کی رویت کے حوالے سے فیصلے کیے گئے۔
چیئرمین مولانا عبدالخبیر آزاد نے پریس کانفرنس کے دوران اعلان کیا تھا کہ 12 ربیع الاول 17 ستمبر بروز منگل کو ہوگی۔
دنیا بھر کے مسلم ممالک میں نبی اکرم ﷺ کے یومِ ولادت کو مذہبی عقیدت و احترام کے ساتھ منایا جاتا ہے۔ اس دن کا آغاز وفاقی دارالحکومت اسلام آباد میں 31 اور تمام صوبائی دارالحکومتوں میں 21 توپوں کی سلامی سے ہوتا ہے۔ مساجد میں نماز فجر کے بعد مسلم اُمہ کے اتحاد اور ملک کی ترقی و خوشحالی کے لیے خصوصی دعائیں مانگی جاتی ہیں۔
نبی اکرم ﷺ کی حیات مبارکہ اور تعلیمات پوری انسانیت کے لیے روشنی کی کرن ہیں، اور اس موقع پر خصوصی کانفرنسز، تقریبات، اور محفل میلاد کا انعقاد کیا جاتا ہے۔ عمارتوں، گلیوں، شاہراہوں، مساجد اور گھروں کو برقی قمقوں سے سجایا جاتا ہے۔
